Interview Radio 32 (2008)

SPORTLICHER AUFTRITT FÜR BUCANERO AUF RADIO32

Radio32 hat zum frühzeitigen Ausscheiden des SCB die Meinung eines Fanclubs aus der Region gesucht und ist dabei auf Bucanero Bern gestossen. Nachstehend das Interview, welches Radio32 mit unserem Präsidenten Markus Steiner geführt hat.

Radio32: Markus Steiner, dr SC Bärn isch usgschide im Playoff Viertufinau gäge Firbourg Gotteron. Wi töif steckt dr Schock eigentlech no i March u Chnoche?

Markus: Ja dä isch natürlech sehr töif. I dänke, me isch aus Titufavorit i die Saison gstartet, het d Qualifikation überragend gwunne u isch iz am 8. platziert - a Fribourg gschitteret, wi bereits scho gäge Chlote u das duet natürlech sehr weh, ja.

Radio32: Gits Erklärige, werum dass dr SCB usgschide isch?

Markus: Ja nach Erklärige zsueche, das isch natürlech schwär. Schlussändlech isch das no Sport u das wird ufem Ischfäud entschide u dr Glücklech dä gwinnt schlussändlech o und esch schwär das chönne zsäge was iz eigentlech dr Grund isch gsi. Si hei guet gspiut an und für sich, hei di Fribourger ou unger Druck gsetzt hei kämpft, das het mi o wichtig düecht u hei aus probiert, gschosse us aune Lagene, am Caron jewils aube ou d Sicht gnoh. Dr Glücklech het iz haut gwunne, si hei das o verdient, muessme auso o gseh. I meine: si hei aus Team o überzügt gha, hei zämegha, si gschlosse gsi, u heisech natürlech uf d Defensive konzentriert gha u do heisech iz Bärner haut dZäng usbisse.

Radio32: Vor 2ne Johr isch am SCB jo genau zgliche passiert, me isch äbefaus ider 1. Playoffrundi usgschide, denn het me när Tabula rasa gmacht. Dr Sportchef het müesse ga, dr Trainer het müesse ga - ize söu das nid dr Fau si. Dr Sven Leuenberger u dr John Van Boxmeer dörfe blibe wi dr CO dr Marc Lüthi gseit het. Isch das dr richtig Wäg, wo dr SCB da ischlaht?

Markus: Ja ganz klar. I meine, z Ufträtte isch nid verglichbar mit Chlote anno dazumau u d Spiler hei o kämpft u si engagiert gsi, und mir hei gseh das si wei und das isch dr Ungerschid zum letschte Mau gsi, u i dänke o, dass dr Van Boxmeer exzellänti Arbeit leischtet u dr Sven Leuenberger o. I dänke o mit de Transfers wo si tätiget hei ir Vergangeheit u wo si hei chönne tätige ize hei si iwandfreie Job gmacht u i dänke dases o wichtig isch dasme e gwüssi Konstanz ine bringt is Team u für mi het dr Herr Lüthi absolut richtig entschide.

Radio32: Markus Steiner, dir sit Präsident vom SCB Fanclub Bucanero. Vo wo chunt eigentlech dä Name?

Markus: Ja üs gits sit am Meischterjahr 2004 und mir hei rund 50 Aktivmitglider u 20 Passivmitglider und dr Name – mir hei lang gsuecht gha nachem geignete Name – e Name wo wo innovativ isch u o chli exotisch isch und dürne Kolleg wo z Kuba i de Ferie isch gsi u wo z Kuba jewils es Bier trunke het wo Bucanero gheisse het simer när eigentlech uf dä Name cho.

Radio32: Markus Steiner, i dankenech für das Gspräch, ufwiderlose.

Markus: Danke öich viumau